Setu an abardaez, an heol o vont da guzh
'Tiskenn a-dreñv d'ar roz, hag hen ken ruz ken ruz
Tomm vo adarre warc'hoazh. Krazat a rei ar foenn
Azviñ a rei an ed, n'eus ket a goumoulenn

Ar yer 'bign war o c'hlud, ha setu ar vatezh
O walc'hiñ ar gaoter, vo ket a batatez
Da goañv, vo yod ed-du, ar mevel laouen bras
Deu d'ar gêr, war e gein gantañ ur bern yeot glas

"It alese Laoic, davit ar saout raktal !"
Hag ar paotr saout en hent, e skourjez o strakal
'Vel ma strak e skourjez, diskabell, diarc'hen
O tremen dre ar c'hoad e kan ur ganaouenn

Setu ur vandenn saout 'tont d'an traoñ 'n ur redek
Ha Laoic war o lerc'h, selaouit me ho ped
'Vel ma strak e skourjez, e c'halvas peb unan
E saout dre o anv, buoc'h du, buoc'h vrizh, buoc'h voan

It holl d'an dour, d'al lenn, hag ar saout o vlejal
Ha Laoic war o lerc'h, e skourjez o strakal
Hag ar moc'h o c'houlenn o c'hoan ouzh ar vatezh
Setu an trouz a glever, en-dro d'un tiegezh

Al loened zo 'n o c'hraou, an dud 'n o gweleoù
Bremañ ne glever ken trouz nemet a-wechoù
D'un tremener bennak o harzal mouezh ar c'hi
Pa gan an eostig-noz er we'enn 'dreñv d'an ti



Le sujet

Une chanson sur les travaux des champs, le gars Louis qui garde les vaches, le doux chant des cochons qui réclament leur nourriture ; puis, quand la nuit tombe, le calme revenu, troublé seulement par les aboiements du chien après un passant, et par le chant du rossignol sur l'arbre derrière la maison


Source

"Kanaouennoù Pobl", chansons recueillies par Alfred Bourgeois dans la deuxième moitié du XIXème siècle ; le recueil a été publié en 1959 à Paris